Suraj dhaltaa hai

Dunia ko sir chhupaane ko

Aaram dene ko

Per fir ugtaa hai nayi subah lekar

Aasha ki kiran jagaane ko.

Jalta hai khud par

Dunia par ujiyaara karta hai

Zindagi deta hai

Saanso ko

Dhalti hui laali mein

Thandak deta hai

Jalte ehsaaso ko

Ugti hui usha mein

Jeevan ka ishaara karta hai.

Jalta to main bhi hoon

Par uske sa

Kuchh bhi nahi karta hoon

Dhota hoon udaasi ko

Din ko

Raato ko

Aasuon se pitara bharta hoon

Sochta hoon

Samajhta hoon

Par apni gehraai ko

Doosre ki unchaai mein badalne se darta hoon

Andar hi ghut-ta hoon

Fir jaane kyu

Roshni se kinaara karta hoon.

Shayad kisi ka sooraj nahi mai

Isi khaahish me

Jee-mar kar

Apni hi kashti se

Lehro mein kinara karta hoon.

Sun raha hai koi kya?

Apni hi baato mein

Yaa main bas har pal

Yu hi aahein bharta hoon?

Dum nikal nahi sakta

Ye to main jaanta hi hoon

Jaagti in raato ko

Bebas sa

Nindiyaara karta hoon..

-Himadri